Vieiros

“Menos sotanas e máis lesbianas!”. “Menos procesións e máis maricóns!”. “Un mundo machista non hai quen o resista!”. Con proclamas coma esta celebrouse a pasada fin de semana a manifestación coa que Maribolheras Precárias celebrou o Día do Orgullo Gai polas rúas da Coruña. As fotografías e as montaxes audiovisuais desta cita lúdica e reivindicativa xa están na rede, ofrecendo imaxes desta manifestación contra o machismo imperante na sociedade e a prol da liberdade sexual.

Baixo o lema “Mellor descontroladas que institucionalizadas”, esta marcha na que participaron ducias de persoas denunciou tamén a “crecente institucionalización e despolitización” de parte do movemento LGTB, así como a instrumentación de diferentes colectivos como 7 Cores (PSOE) ou Colega-Galicia (PP), ós que acusan de baleirar de contido transgresor a mensaxe de liberación sexual. “A filosofía imperante, froito do pensamento único, racha con toda a tradición teórica e política do movemento”, din as Maribolheras, quen fai un chamado a “fortalecer máis que nunca as nosas redes e denunciarmos toda a utilización con intereses partidistas do movemento LGBT”.

• Podes acceder aquí a un album de fotos da xornada lúdica e reivindicativa
• Podes ver aquí un vídeo da manifestación (GZContrainfo)