Vieiros

O ministro de Exteriores de Rusia, Serguei Lavrov, comunicoulle este venres ao goberno de Serbia que os sucesos de Belgrado desta quinta feira exercen un impacto negativo nos esforzos de ambos os países por solucionar o problema de Cosova, informou o departamento.

Estados Unidos cualificou de "intolerábel" o asalto que sufriu a súa embaixada, e a UE exixiulle ao goberno serbio que se esforce por protexelas, á vez que advertiu de consecuencias de cara a súa posíbel adhesión.

O primeiro ministro de Serbia, Vojislav Kostunica, tamén lles pediu aos seus concidadáns que evitasen os actos de violencia, xa que poderían resultar "prexudiciais para a loita polos intereses nacionais".

"Os que apoian o falso Estado de Cosova alédanse ao ver as manifestacións de violencia en Belgrado. Vólvolles pedir a todos os cidadáns que eviten o mínimo incidente, en aras de Serbia", declarou Kostunica este venres nunha alocución ao pobo.

Advertencia de Rusia á OTAN
Por outra banda, o embaixador ruso na OTAN, Dmitri Rogozin, pediulle á Alianza que evitase que as forzas despregadas en Cosova, a KFOR, se inmiscise na política e manteñan "unha postura de neutralidade e non inxerencia nos asuntos internos", ou do contrario a polémica poderíase volver "bastante dramática".

"Non haberá unha guerra, mais tampouco profunda comprensión recíproca ou avance noutros proxectos, porque existe un conflito ideolóxico", sinalou.

"Parécenos moi negativa a noticia alarmante que, desde logo, debe ser comprobada aínda, de que algúns militares e xefes da Alianza expuxeron a posibilidade de impedir o acceso de dirixentes serbios ao territorio de Cosova. É algo que non está previsto no seu mandato", advertiu Rogozin.

• Anterior: Un morto e 80 feridos logo do ataque á embaixada de EUA en Belgrado

• Continúan as reaccións: Os serbios de Bosnia reivindican o seu dereito á independencia